Papa Leon XIV ka reaguar për herë të parë pas sulmit të paprecedentë të Izraelit ndaj disa udhëheqësve të Hamasit në Doha në Katar. Teksa largohej nga Villa Barberini në Castel Gandolfo, Papa u ndal për pak pranë gazetarëve, duke ndarë shqetësimin e tij për situatën e tensionuar në Lindjen e Mesme. "Ka disa lajme vërtet serioze tani. Sulmi i Izraelit ndaj disa udhëheqësve të Hamasit në Katar. E gjithë situata është shumë serioze. Nuk e dimë se ku po shkojnë gjërat, duhet të lutemi", u shpreh Papa. Sulmi në fjalë, që goditi zyrën politike të Hamasit në Doha, është konfirmuar si një operacion edhe nga ana e Izraelit. Zyra e Kryeministrit Benjamin Netanyahu deklaroi se ky sulm kundër udhëheqësve kryesorë terroristë të Hamasit ishte një operacion plotësisht i pavarur izraelit. Ndërkohë, ministri izraelit i Sigurisë Kombëtare, Itamar Ben Gvir, e përshëndeti vendimin për sulmin: "Gjaku hebre nuk është më i braktisur. Vendimi që morëm për të goditur ata që na çuan në masakrën e 7 tetorit është një tjetër vendim historik në një seri vendimesh të rëndësishme që kemi marrë." Autoritetet e Katarit kanë nisur hetime të nivelit më të lartë lidhur me këtë sulm dhe kanë bërë të ditur se informacionet e tjera rreth ngjarjes do të publikohen sapo të jenë të disponueshme.