Mijëra njerëz kanë mbetur pa energji elektrike pasi një stuhi u përplas mbi pjesën veriperëndimore të SHBA, duke sjellë më shumë se 75 centimetra borë në rajonin e Sierra-s e duke bërë që të mbyllen shumë rrugë në kaliforninë veriore. Shërbimi kombëtar i motit lëshoi një paralajmërim për stuhi në zonën e liqenit Tahoe, me reshje të shumta bore dhe erë të fortë. Mbrëmjen e të dielës, më shumë se 20 mijë shtëpi ishin pa energji elektrike në Uashington, 14 mijë në kaliforni dhe më shumë se 10 mijë të tjera në oregon. Shërbimi kombëtar i motit tha se 10 cm borë ranë në Siatëll, ku era e ftohtë ka bërë që temperaturat të ulen ndjeshëm. Temperatura të acarta pritet të regjistrohen në rajon të paktën deri të enjten. Në kaliforninë e veriut, ranë afro 74 cm borë në harkun kohor të 24 orëve. Reshjet vazhduan edhe gjatë të hënës pasi edhe një tjetër stuhi e radhës do të mbërrijë. Disa rrugë malore u mbyllën për shkak të bllokimit të tyre nga bora apo për shkak të shikueshmërisë së ulët.