Aksionin kundër strukturave paralele serbe në Kosovë e kundërshtoi edhe zyra e Bashkimit Europian në Prishtinë. Brukseli ndau të njëjtin shqetësim si SHBA, duke kërkuar nga autoritetet e Kosovës që të mos ndërmarrin veprime të pakoordinuara me partnerët ndërkombëtarë. Si SHBA, ashtu edhe BE kërkojnë që çështja e strukturave paralele serbe të zgjidhet në kuadër të procesit të dialogut mes dy vendeve. Kosova u është përgjigjur përmes ambasadorit të saj në Bruksel, Agron Bajrami. “Për sqarim: Këto ishin struktura ilegale të drejtuara nga Serbia. Nuk ka marrëveshje që përcakton negociatat për të ardhmen e këtyre strukturave. Operacioni i sotëm i Policisë së Kosovës nuk shkaktoi tensione”, shkruan Ambasadori. Sipas BE-së, statusi i strukturave të mbështetura nga Serbia parashikohet të zgjidhet përmes dialogut të lehtësuar nga BE-ja dhe Kosova duhet të demonstrojë qëndrueshmëri ndaj detyrimeve e saj në kuadër të Dialogut.