Zhdukja brenda një dekade e gjashtë burrave dhe djemve të fisit Lleshi nga fshati Bruç i Matit dyshohet se është produkt i një hakmarrjeje të pamëshirshme me zanafillë vrasjen e 25 vjeçarit, Agim Hoxha, ngjarje kjo e ndodhur në prill të vitit 2012 në Britaninë e Madhe. Prokuroria e Posaçme thotë se ka siguruar provat e mjaftueshme për të faktuar se rrëmbimi dhe më pas vrasja në verën e vitit 2020 e 24 vjeçarit Klevis Lleshi është porositur nga shtetasi Aurel Hoxha, familjar i Agim Hoxhës dhe pronar i një lokali me emër në zonën e Myslym Shyrit në Tiranë. Dosja po hetohet nga vetë kreu i SPAK, Altin Dumani dhe me urdhër të tij forcat e ndërhyrjes së shpejtë kanë ushtruar në orët e para të mëngjesit të së premtes një kontroll te lokali Aurel Hoxhës. Burime nga Prokuroria e Posaçme, pohojnë për Top Neës se në zbardhjen e ngjarjes kanë ndihmuar edhe përgjimet e aplikacionit Sky EÇ dhe dyshohet se janë përfshirë edhe tre persona të tjerë, për të cilët është lëshuar urdhër-arresti. 24-vjeçari Klevis Hoxha u rrëmbye në qendër të qytetit të Burrelit në gusht të vitit 2020, ndërsa në shkurt të vitit 2023 eshtrat e tij u gjetën rastësisht nga banorët e fshatit Shpërdhet pranë Mamurrasit.