Ish-shefi i Operacionales, Oltion Bistri, dhe familjarët e tij, të cilëve SPAK u ka sekuestruar pasuritë, kanë bërë rekurs në Gjykatën e Lartë. Ata kërkojnë lirimin e pasurive nga masa e sekuestros, vlera e të cilave shkon në rreth 3 milionë euro. Bistri u arrestua në vitin 2023 me akuzën e pjesëmarrjes në organizatë kriminale në kuadër të dosjes “Metamorfoza”. Ai u vendos nën akuzë nga SPAK pas zbërthimit të aplikacionit të koduar Encro Chat dhe SKY ECC. Së bashku me të u prangosën edhe biznesmeni Pëllumb Gjoka si dhe ish-prokurori Xhevahir Lita. Ndaj Bistrit rëndojnë akuzat për ‘korrupsion pasiv’, ‘Zbulimi i akteve ose të dhënave sekrete’ dhe ‘Pastrimi i produkteve të veprës penale ose veprimtarisë kriminale’ dhe prej rreth një viti ndodhet prapa hekurave. Ndërkohë në muajin maj të këtij viti SPAK vendosi t’i sekuestrojë ish-shefit të operacionales 22 dyqane dhe ambiente biznesi; 10 apartamente; 1 vilë, 200 metra truall në kryeqytet, një garazh dhe një makinë.