Mënyra se si perëndimi po përballet me Vladimir Putinin, rrezikon të përsërisë gabimin e bërë në përballjen me Hitlerin para luftës së dytë botërore – paralajmëron sekretari britanik i Mbrojtjes. Ben Uollace thotë se ka një ‘aromë Mynihu’ në ajër, duke iu referuar marrëveshjes famëkeqe në të cilën Britania e Madhe dhe Franca lejuan liderin nazist të rrëmbente territore në këmbim të premtimit për paqe. Paralajmërimi i tij drithërues vjen ndërsa bota po pret që Rusia të pushtojë Ukrainën brenda disa ditësh. Ai tha se 130 mijë trupat ruse të mbledhura në kufijtë e ukrainës, mund të nisin sulmin në cdo kohë, pavarësisht përpjekjeve të vazhdueshme diplomatike. Dhe Uollace mendon se perëndimi mund të përsërisë edhe gabimin e madh historik të keqllogaritjeve që cuan më pas në Luftën e dytë botërore. “Mund të ndodhë që ai të fikë tanket e tij dhe të gjithë të shkojmë në shtëpi, por ka një aromë Mynihu në ajër, sidoqoftë’, tha Uollace. Duke folur për The Sunday Times, sekretari britanik i mbrojtjes e cilësoi rritjen e fuqisë ushtarake ruse në kufi si shqetësuese.