Krijimi i shtetit sovran të urdhrit bektashi në Shqipëri bëri jehonë në mediat ndërkombëtarë, pas prezantimit të idesë nga kreu i qeverisë Edi Rama në mbledhjen vjetore të Asamblesë së Përgjithshme të Organizatës së Kombeve të Bashkuara. Një ekip xhirimi i The Jerusalem Post u nis drejt Tiranës për të takuar dhe intervistuar Baba Mondin. Gazetari Eldad Beck thotë se në një kodër me pamje nga qenda e Tiranës, në kryegjyshatën e bektashinjve u takua me Baba Mondin, i cili ndiqej nga truproja që siguronin neutralizimin e çdo kërcënimi të mundshëm. Në artikull gazetari shkruan: “Pak para se të fillonte intervista, Baba Mondi më befasoi me një pyetje: "Do të pish kafe apo raki?" Meqë hezitoja të zgjidhja alkoolin në prani të një udhëheqësi fetar mysliman, ai më inkurajoi të provoja rakinë vendase. Bektashinjtë me të vërtetë përfaqësojnë një tjetër lloj islami, janë mendjehapur dhe tolerantë.”