Melania Trump ka ndezur dritat e pemës së Krishtlindjes në Shtëpinë e Bardhë. “Faleminderit shumë të gjithëve dhe Krishtlindje të gëzuara. Ky do të jetë një vit i madh”, tha presidenti amerikan gjatë ceremonisë që ishte e regjistruar në avancë për shkak të pandemisë së koronavirusit. Presidenti kishte në krah Zonjën e parë, Melanian, e cila pati nderin të ndizte dritat e bredhit 30 metra të lartë të ardhur nga Kolorado, e të vendosur në hyrjen e Shtëpisë së Bardhë. Më herët, zonja e parë Melania, u kujdes për zbukurimin e Shtëpisë së Bardhë për Krishtlindjen e fundit të tyre atje. Tema e zbukurimeve të këtij viti ishte “E bukura Amerikë” dhe mes të tjerash, u nderuan edhe punonjësit e shërbimeve jetike që përballen çdo ditë me pandeminë në Shtetet e Bashkuara me një bredh të vendosur në dhomën e kuqe. Në të gjithë Shtëpinë e Bardhë janë vendosur 62 bredha, 106 kurora, mbi 366 metra shirita festivë dhe mbi 3200 llamba.