Kandidatja opozitare Gordana Siljanovska-Davkova ka fituar bindshëm raundin e parë të zgjedhjeve presidenciale në Maqedoninë e Veriut të mërkurën, dhe do të përballet me presidentin aktual, Stevo Pendarovski, në balotazh, muajin e ardhshëm. Por, me gjithë fitoren bindëse të Davkovës në raundin e parë, votat e shqiptarëve munden përsëri të luajnë rol kyç në raundin e dytë, sic ndodhi edhe para pesë vjetëve. Sipas Komisionit Shtetëror të Zgjedhjeve, Davkova, e cila vjen nga partia opozitare VMRO DPMNE, fitoi 40.10 për qind të votave, ndërsa Stevo Pendarovski nga Lidhja Social Demokrate në pushtet, fitoi 19.93 për qind të votave. Shtatë kandidatë garuan në raundin e parë, në mesin e të cilëve edhe dy shqiptarë, të cilët nuk ia dolën të fitonin vota të mjaftueshme për të siguruar balotazhin. Bujar Osmani nga Fronti Evropian i mori 13.36 për qind të votave, ndërsa Arben Taravari nga koalicioni opozitar VLEN 9.21 për qind të votave.