Izraeli ka kryer sulme të mëdha ajrore në Rripin e Gazës, Liban dhe në jug të Sirisë kundër ekstremistëve që po planifikojnë sulme terroriste. Bombardimet izraelite kërcënojnë shpërthimin e një konflikti të ri dhe të përgjakshëm rajonal. Kryeministri i Izraelit, Benjamin Netanyahu, tha se urdhëroi ushtrinë të ndërmarrë “veprime të fuqishme” kundër Hamasit për shkak se ky grup i mbështetur nga Irani nuk pranoi të lirojë pengjet e mbetura dhe hodhi poshtë propozimet për një armëpushim të ri. “Izraeli, nga ky çast, do të veprojë me forcë ushtarake kundër Hamasit”, tha zyra e Netanyahut në një deklaratë për shtyp. Të paktën 326 persona, përfshirë gra dhe fëmijë, u vranë në bombardimet izraelite në Gazë të martën, sipas zyrtarëve shëndetësorë në enklavë. Njëkohësisht, ushtria izraelite tha se ka kryer sulme ajrore edhe në Libanin jugor dhe Sirinë jugore. Ushtria izraelite tha se sulmet në Gaza kishin në shënjestër liderë dhe komandantë të nivelit të mesëm të Hamasit, si dhe infrastrukturën e grupit. Ajo deklaroi se është e gatshme të vazhdojë sulmet kundër Hamasit për aq kohë sa do të jetë e nevojshme.