Është shkatërruar një grup i strukturuar kriminal, në fushën e trafikimit të lëndëve narkotike dhe shpërndarjes të drogave të forta në qarkun e Korçës. Në operacionin policor të koduar “Piramida”, vijim i dy operacioneve antidrogës të finalizuar më parë “Lapidari” dhe “Pusteci”, pas një hetimi disa mujor, ka shkuar në 12 numri i të ndaluarve. Së fundmi blutë i kanë vënë prangat edhe 7 personave të tjerë, mes tyre organizatori i grupit, poseduesit dhe transportuesit e lëndëve narkotike, keta bashkëpunëtorë me 5 të arrestuarit më parë nga Policia. Ndalimi nga policia u bë në bazë të vendimeve të Gjykatës së Rrethit Gjyqësor Korçë e cila ka caktuar masën e sigurisë “Arrest në burg” për 7 të ndaluarit. Kujtojmë që policia në dy operacionet e mëparshme, dokumentoi me prova ligjore, implikimin e 7 shtetasve të arrestuar këtë të premte për aktivitetin e paligjshëm që ushtronte ky grup i strukturuar kriminal. Në cilësinë e provës materiale në ngjarjet e mësipërme u sekuestruan në total 23 kg e 600 gr sasi e dyshuar narkotike kanabis; 6 gr lëndë e dyshuar narkotike kokainë; 1 armë gjahu teke; 7 automjete; 16 celularë; sasi në lek dhe euro” bëhet e ditur nga policia.