Një konflikt për motive të dobta mes dy kunetërve në zonën e Kombinatit në Tiranë, degjeneroi në përdorimin e armës së zjarrit, ku për pasojë një person mbeti i plagosur. 41 vjecari Misir Tanushi pas një debati me kunatin e tij Genci Mullaymeri qëlloi këtë të fundit me plumb në kofshë. Ngjarja ndodhi rreth orës 15:40 brenda banesës së të dëmtuarit, në rrugën “Llambi Bonata”, teksa 56 vjecari u dërgua në spital për ndihmë mjekësore dhe fatmirësisht ndohet jashtë rrezikut për jetën. Shërbimet e komisariatit numër 6 shoqëruan autorin e dyshuar, i cili pritet të merret në pyetje për të kuptuar se si nisi konflikti mes tij dhe kunatit, nëse ishte apo jo një sherr i castit si dhe për të kuptuar se ku e kishte gjetur armën Misit Tanushi. Lidhur me këtë ngjarje, policia ka shpallur në kërkim një 29 vjecar, si person të përfshirë në këtë ngjarje. Sipas njoftimit zyrtar që përcolli policia e Tiranës, i riu ka qenë i pranishëm në banesë në momentin që ka ndodhur ngjarja dhe është larguar pasi është plagosur 56 vjecari Genci Mullaymeri. Grupi i hetimit sekuestroi armën e zjarrit, e cila do i vihet në dispozicon më vonë organit të akuzës për nisjen e hetimit.