Fadromat e Inspektoriatit të Mbrojtjes së Territorit në Durrës mbërritën të premten në resortin e ndërtuar pa leje nga ish shefi i tyre, Ardian Halili. Resorti, i përbërë nga një godinë dykatëshe dhe 11 garsoniere u shemb me fadroma dhe tritol në aksionin e ndërmarrë, ndërsa pronari i tij është në arrest me burg me akuzën e ndërtimit pa leje. Nga verifikimet rezultoi se resorti Saint Michelle Residence u ndërtua pa leje në një sipërfaqe prej 5600 metrash katrorë ku përfshiheshin dhoma hoteli, 11 garsionera, pishinë, një ambient sportiv dhe një restorant, u ndërtua nga viti 2018 e në vazhdim, periudhë gjatë së cilës Halili ishte në krye të IMT-së së Durrësit. Ndërtimet vijuan dhe pas ikjes së tij nga ky post. Halili është bashkëshort i ish-prokurores së Durrësit, Rabiana Halili e cila dha dorëheqjen gjatë procesit të Vetingut. Që nga dita e hënë kur ka nisur aksioni për prishjen e objekteve të paligjshme në zonën e Ishmit janë shembur 55 objekte.