SHBA ka testuar me sukses një raketë hipersonike në mes të marsit por e ka mbajtur të fshehtë këtë për të evituar përshkallëzimin e tensioneve me rusinë. Testi është zhvilluar ndërsa presidenti Joe Biden do të udhëtonte në Evropë – thotë një burim i mbrojtjes amerikane. Raketa hipersonike u lëshua nga një bombardues B-52 në bregun perëndimor në një test të suksesshëm të versionit të prodhuar nga Lockhet Martin. Një motor shtytës ka bërë që ajo të udhëtojë me shpejtësi hipersonike që ka arritur madje në më shumë se Mach 5. Zyrtari dha pak detaje për testimin e raketës por tha se ajo kishte fluturuar në një lartësi prej 20 km për më shumë se 500 km. Por edhe në skajin më të ulët të shpejtësisë hipersonike, në mbi 6 mijë kilometra në orë, një fluturim 500 kilometërsh zgjat më pak se pesë minuta. Testimi vjen disa ditë pasi Rusia tha se kishte përdorur raketat e saj hipersonike gjatë pushtimit të ukrainës duke pretenduar se kishte goditur një depo armatimesh në Ukrainën perëndimore. Bëhet fjalë për raketën ruse Kinzhal, një version i lëshuar nga ajri i raketës balistike ruse Iskander, me rreze të shkurtër veprimi. Në fjalë të tjera, është një variant i një teknologjie ekzistuese dhe jo një revolucion në armatimet hipersonike. Testi amerikan ndërkohë, sipas ekspertëve, ishte më i sofistikuar. Raketa nuk kishte një ngarkesë shpërthyese por mbështetej tek energjia e saj kinetike për të shkatërruar objektivin. SHBA është përpjekur të mos ndërmarrë hapa apo të bëjë deklarata që mund të përshkallëzonin pa shkas tensionet mes Uashingtonit dhe Moskës. Të premten, SHBA anuloi testin e raketës balistike ndërkontinentale minuteman III për të evituar ndonjë keqkuptim nga rusia.