Presidenti i zgjedhur i Shteteve të Bashkuara, Joe Biden, tha se sulmet e fundit kibernetike kundër agjencive të Qeverisë amerikane dhe kompanive paraqesin “shqetësim të madh” dhe premtoi “kosto të rëndë” mbi autorët e tyre. Agjencia e Sigurisë Kibernetike dhe e Sigurisë së Infrastrukturës në SHBA tha se sulmet paraqesin “rrezik të madh” për rrjetet kompjuterike të qeverisë, të infrastrukturës kritike dhe të sektorit privat dhe se mund të jetë e vështirë për t’u pastruar. Agjencia tha se heqja e softuerëve të këqij nga sistemet e komprometuara “do të jetë shumë komplekse dhe sfiduese për organizatat”. Departamenti i Sigurisë Kombëtare, Departamenti i Thesarit dhe Departamenti i Tregtisë janë në mesin e atyre që janë sulmuar. Hakerë që punojnë për një qeveri të huaj, kanë ndërmarrë sulmet, të cilat kanë nisur muaj më parë, por janë zbuluar kohët e fundit. “Na duhet t’i ndërpresim dhe parandalojmë kundërshtarët tanë nga ndërmarrja e sulmeve kibernetike. Do ta bëjmë këtë, përveç tjerash, duke vendosur kosto të madhe mbi përgjegjësit e sulmeve të tilla keqdashëse” Senatori demokrat, Dick Durbin, pas një konference të agjencive të inteligjencës amerikane, fajësoi Rusinë për sulmet. Ambasada ruse në Uashington mohoi çdo përfshirje, duke thënë se Rusia “nuk kryen operacione sulmuese në fushën kibernetike”. Sidoqoftë, Presidenti i zgjedhur, i cili do të inaugurohet më 20 janar, tha se do ta bëjë sigurinë kibernetike përparësi kryesore të administratës së tij.