Administrata Biden beson se shitja e mundshme e avionëve ushtarakë F-16 për turqinë do të ishte në një linjë me interesat amerikane për sigurinë kombëtare dhe do ti shërbente edhe unitetit afatgjatë të NATO-s, tha departamenti amerikan i shtetit në një letër drejtuar kongresit, që sidoqoftë, nuk e mbështeste haptazi marrëveshjen. Turqia i drejtoi një kërkesë në tetor, shteteve të bashkuara, për të blerë 40 avionë luftarakë F-16 të prodhuar nga Lockheed Martin dhe afro 80 njësi modernizimi për avionët e saj ekzistues. Uashingtoni deri më tani është përmbajtur nga dhënia e një opinioni mbi shitjen, duke thënë se duhen kaluar të gjitha hallkat standarte të procesit të shitjes së armatimeve. Shitja e armëve amerikane për Turqinë, aleate të NATO-s, është bërë një temë delikate pasi Ankaraja bleu sistemin rus të mbrojtjes nga raketat S-400, duke ndezur sanksionet amerikane si edhe nxjerrjen e turqisë nga programi i avionëve luftarakë F-35.