Selitë diplomatike të Brukselit dhe Uashnigtonit dënuan njëzëri zjarrvënien dhe aktet e dhunshme të ndërmarra në parlamentin shqiptar, në shenjë proteste për hetimet e organeve të drejtësisë ndaj Ervin Salianjit, Sali Berishës, Fatmir Mediut, Ilir Metës dhe Fredi Belerit. Ambasadori i Bashkimit Europian, Silvio Gonzato bëri thirrje për dialog, shmangie të sulmeve personale dhe verbale, dhe kthim në normalitet. Gonzato: “Në fakt për këtë është për të ardhur keq, në fakt për një çështje tjetër disa përfaqësues të opozitës më vonë ditën e djeshme përdorën mënyra që ndërpresin mbarëvajtjen e jetës parlamentare në Kuvend dhe kjo është vërtet për të ardhur keq. Çfarë do lloj qëndrimi apo ideje që mund të kemi nuk është kjo mënyra për ta shprehur mendimin. Gjithashtu më duhet të them që në një demokraci funskionale si Shqipëria, pakënaqësi nga më të ndryshmet duhet të shprehen në mënyrën e duhur dhe nuk duhet që të përdoret dhunë apo që të behet dhunë apo që të bëhen dëmtime ndaj pronës për të shprehur mendimin. Sepse deputetët e Kuvendit të Shqipërisë duhet të kenë mundësinë që të përmbushin dhe të luajnë rolin e tyre në siguri të plotë.” Ambasada Amerikane nxiti palët politike të vetëpërmbahen dhe të përqafojnë vlerat e qytetarësië dhe respektit.