Rusia ka kërcënuar se do të intensifikojë sulmet e saj të pandërprera ndaj Kievit dhe ka paralajmëruar diplomatët e huaj dhe vizitorët e tjerë që të largohen nga vendi, përndryshe do të ekspozohen ndaj “rrezikut vdekjeprurës”, ndërsa lideri i Ukrainës tha se vendi i tij do t’i përgjigjet fushatës vdekjeprurëse ajrore të Kremlinit. “Ministria e Jashtme ruse edhe një herë paralajmëron shtetasit e huaj, përfshirë stafin e misioneve diplomatike, që të mos qëndrojnë në Ukrainë ose të udhëtojnë drejt territorit të saj”, tha ministria. “Përgjegjësia për çdo pasojë negative bie tërësisht mbi ata që e shpërfillin këtë paralajmërim”, tha ajo, duke shtuar se “jo të gjithë u janë bindur këtyre paralajmërimeve dhe po i ekspozojnë me vetëdije jetët e tyre ndaj rrezikut vdekjeprurës”. Presidenti ukrainas, Volodymyr Zelensky, ndërkohë, tha se shërbimet e inteligjencës së Kievit kishin siguruar dokumente që tregonin se lideri rus, Vladimir Putin, kishte nxjerrë një “doktrinë të re” për sulmet ushtarake ndaj një game më të gjerë objektivash civile, në prag të muajve të ashpër të dimrit që po afrohen. Zelensky tha se forcat e tij nuk do të godasin infrastrukturën civile por do të përgjigjen në cdo mënyrë të mundshme. Nëse sulmohet energjia jonë, ne do të godasim energjinë e tyre – tha zelenski.