Shërbimi rus i burgjeve i dha një ultimatum të minutës së fundit kritikut të Kremlinit Alexei Navalny: Kthehu menjëherë dhe paraqitu në zyrën e Moskës herët të martën në mëngjes, ose te pret burgu nëse vjen pas këtij afati. Navalny, një nga kritikët kryesorë të Presidentit Vladimir Putin, u dërgua në Gjermani për trajtim në gusht pasi u sëmur gjatë një udhëtimi ajror në atë që Berlini dhe vendet e tjera perëndimore thonë se ishte një përpjekje për ta vrarë me agjentin nervor Noviçok. Moska thote se nuk ka parë asnjë provë që të tregojë se ai ishte helmuar dhe ka mohuar çdo përfshirje në incident. Shërbimi Federal i Burgjeve (FSIN) akuzoi të hënën Navalny-n për shkeljen e rregullave të një dënimi me kusht që ai po vuan për një shkelje që daton në vitin 2014 dhe për shmangien e mbikëqyrjes së autoritetit të inspektimit penal të Rusisë. Duke cituar një artikull në revistën mjekësore britanike The Lancet në lidhje me trajtimin e tij, thuhet se Navalny ka dalë nga spitali në Berlin më 20 shtator dhe se të gjitha simptomat e sëmundjes së tij ishin zhdukur në 12 tetor. "I dënuari nuk po përmbush të gjitha detyrimet e vendosura mbi të nga gjykata dhe po i shmanget mbikëqyrjes së Inspektoratit Penal", theksohet në deklaratë. Navalny po vuan një dënim me kusht prej tre vjet e gjysmë për një rast vjedhjeje që ai thotë se ishte i motivuar politikisht. Periudha e dënimit skadon në 30 dhjetor.