Kryetari i Kuvendit, Gramoz Ruçi ka kërkuar që mbledhjet “online” të Komisioneve Parlamentare të trajtohen më me respekt dhe seriozitet nga ana e deputetëve. Ky apel i kryeparlamentarit vjen në një kohë, kur prej ditesh nuk kane munguar rastet, kur deputetët shfaqen në ambiente aspak komode për të bërë shqyrtimin e ligjeve. Deputetët gjate zhvillimit te mbledhjes “online” të Komisioneve Parlamentare jane pare nga makinat e tyre dhe lokale. Për të gjitha mbledhjet e komisioneve që zhvillohen online do të kërkoja etikën dhe rigorozitetin e të gjithë pjesëmarrësve. Jeni në sytë e publikut, siç jeni ju dhe unë “online”, janë “online” edhe ato për publikun dhe nuk është serioze që, ndërkohë që zhvillohet mbledhja e Komisionit, deputeti, meqë ia lejon elektronika, të flasë nga makina. Këto nuk duhen toleruar nga asnjë kryetar Komisioni, ka deklaruar kreu i kuvendit, Gramoz Ruci. Mbledhjet “online” të Komisioneve Parlamentare, filluan në javët e para të muajt prill, fill pasi në vend filloi regjimi i karantinës dhe nuk lejohej dalja nga shtëpia dhe si një tentativë për të shmangur grumbullimet në hapësira të vogla. Ndërkohë, në javët e fundit nga Kuvendi janë vënë në dispozicion 3 ambiente ku mund të zhvillohen mbledhjet e Komisioneve Parlamentare me prezencë fizike të deputetëve, duke garantuar protokollet e pandemisë.