Google Maps do të fillojë të udhëzojë drejtuesit e automjeteve tek rruget që konsiderohet se janë më miqësore me tokën, bazuar në një seri faktoresh. Kompania Google tha se do të përfshijë edhe mundësinë e zgjedhjes së rrugëve për udhëtim ku gjenerohet emetim më i ulët i karbonit duke përdorur kryesisht të dhënat e trafikut dhe pjerrësitë e rrugëve. Google sqaroi se ky tipar i aplikacionit do të nisë së pari në SHBA, më vonë këtë vit, dhe pastaj do të zgjerohet në tërë botën. Kjo karakteristikë e re në aplikacionin e navigimit është pjesë e angazhimit të kompanisë për të luftuar ndryshimin e klimës. Kur rrugët alternative janë dukshëm më të shpejta, Google do të ofrojë zgjedhje dhe do t'i lejojë përdoruesit të krahasojnë emetimin e karbonit. Google, në pronësi të Alphabet, theksoi se përdor të dhëna të emetimeve bazuar në testime në lloje të ndryshme të makinave dhe llojeve të rrugëve, duke u mbështetur në njohuritë nga Laboratori Kombëtar i Energjisë së Rinovueshme të Qeverisë së SHBA-së.