Një rrjedhje gazi i mori jetën 11 personave në Indi të dielën, në aksidentin më të fundit vdekjeprurës industrial në këtë vend. Rrjedhja e gazit u regjistrua në Giaspura, një zonë industriale në Panxhab. "Njëmbëdhjetë viktima janë konfirmuar," i thanë gazetarëve zyrtarët lokalë të policisë, që edhe saktësuan se katër persona të tjerë janë shtruar në spital. Sipas tyre, shkaku i rrjedhjes së gazit mbetet ende i panjohur. Pesë gra ishin mes viktimave, raportojnë mediat vendase, ndërsa gjashtë viktimat e tjera përfshijnë dy djem të moshës 10 dhe 13 vjeç. Rrjedhjet e gazit industrial për shkak të standardeve të dobëta të sigurisë dhe kontrolleve të pamjaftueshme janë të zakonshme në Indi. Gushtin e kaluar, të paktën 112 gra u shtruan në spital pas një rrjedhje gazi në një fabrikë të prodhimit të veshjeve në shtetin jugor të Andhra Pradesh. Kjo pasoi një aksident të ngjashëm në qershor, kur rreth 200 gra humbën ndjenjat pas një rrjedhje gazi në të njëjtën zonë. Në vitin 2020, të paktën 15 persona humbën jetën dhe qindra të tjerë u shtruan në spital pas një rrjedhje gazi në një fabrikë kimike në Visakhapatnam, një qytet port industrial në të njëjtin shtet. Thuajse 1000 persona u ekspozuan ndaj gazit dhe më shumë se 500 të tjerë u shtruan në spital probleme të rënda në frymëmarrje dhe acarim të lëkurës dhe syve.