Bilanci i viktimave të koronavirusit në nivel global, ka kapërcyer tashmë 975 mijë. Sipas të dhënave të universitetit Johns Hopkins, nga fillimi i pandemisë numërohen në të gjithë botën 975.038 viktima. Nëse tendenca do të vijojë me këto ritme, deri më 1 tetor do të arrihet shifra e 1 milionë viktimave të Covid 19. Vendi me më shumë viktima, mbetet SHBA, me mbi 201 mijë viktima dhe më pas Brazili me mbi 138 mijë. Për të frenuar infeksionet shumë vende të botës po ashpërsojnë masat e kufizimit. Qeveria izraelite ka miratuar natën e shkuar një izolim akoma më të ashpër krahasuar me atë aktual; do të hyjë në fuqi nga e premtja dhe do të zgjasë deri më 11 tetor, në fund të festave hebraike. Mes masave janë edhe mbyllja e shërbimeve jo të domosdoshme, ndalimi i daljeve përtej 1 kilometri larg nga shtëpia dhe grupimet e më shumë se 20 personave. Edhe në Francë situata po bëhet gjithnjë e më shqetësuese. Pjesa më e madhe e rajoneve të vendit janë zona të kuqe.