Gjykata kundër Krimit të Organizuar dhe Korrupsionit ka rrëzuar kërkesën e Prokurorisë së Posaçme, SPAK, për të sekuestruar pasurinë e ish-kreut të Gjykatës Kushtetuese Bashkim Dedja. Gjyqtari i GJKKO, Erjon Bani ka rikthyer edhe njëherë çështjen në SPAK për përfundim të plotë të hetimeve për këtë çështje. SPAK ngriti ndaj Dedjas akuzën për fshehje të ardhurash dhe deklarim të rremë. Referuar hetimeve të SPAK, rezulton se ish-gjyqtari ka pasuri të paluajtshme që nuk i justifikon me burimet e deklaruara të të ardhurave. Spak mori në verifikim dosjen e ish anëtarit të Gjykatës Kushtetuese BAshkim Dedja I shkarkuar nga vettingu në Komsionin e Posacëm të apelit në dhjetor të vitit 2018 pasi nuk justifikonte burimet e pasurisë, konkretisht dy apartamente, dhe nuk kishte nivelin e besueshëm për të vijuar detyrën. Më herët Komisioni i Pavarur i Kualifikimit e konfirmoi në detyrë kryetarin e Kushtetueses në atë kohë, por Komisioneri Publik vendosi ta ankimojë vendimin në Kolegjin e Posaçëm të Apelimit me kërkesë të Operacionit Ndërkombëtar të Monitorimit. Gjatë vettingut për anëtarët e gjykatës kushtetuse vetëm Vitore Tusha e kaloi, ndërsa të tjerët u shkarkuan dhe u dorëhoqën. Fatos Lulo, Altina Xhoxhaj, Fatmir Hoxha, Gani Dizdari dhe Bashkim Dedja, ishin anëtarët e shkarkuar dhe të dorëhequr rreth 3 vite më parë, duke futur në ngërç dhe nxjerrë jashtë funksionit për më shumë se dy vite insticionin më të lartë të gjyqësorit në vend. Sikur të mos mjaftonin shkarkimet dhe dorëheqjet, emerimet e reja kaluan mes një ping-pongu politik, dhe përplasje institucionale mes presidencës, kuvendit dhe maxhorancës socialiste. Vakanca e krijuar u përmbyll vetëm në fundin e dhjetorit 2020 me emerimet e anëtarëve të rinj të Gjykatës Kushtetuese.