NATO dhe Rusia nuk arritën t’i japin zgjidhje grindjes për Ukrainën. Rreziku i luftës mbetet real, mendon NATO dhe do të vazhdojë bisedimet ndërkohë që Moska bën përgjegjës Perëndimin. "Diskutimet nuk qenë të lehta", u shpreh shkurt Sekretari i Përgjithshëm i NATO-s, Jens Stoltenberg pas takimit të 30 anëtarëve të NATO-s me përfaqësuesit e qeverisë ruse. Lidhur me gjendjen e sigurisë në Europë, vecanërisht në Ukrainë, u bisedua për rreth katër orë në Bruksel, por nuk pati ndryshim të qëndrimeve. „Ne kemi propozuar një seri bisedimesh, edhe për sa i përket dislokimit nga të dyja palët të raketave në Europë. Por pala ruse sot nuk ishte në gjendje të vendoste", tha Stoltenberg. Rusia megjithatë nuk e ka refuzuar një takim tjetër, shtoi ai. Kryenegociatori rus Aleksandr Grushko, akuzoi NATO-n, se nuk i përgjigjet ofertave për zbutjen e situatës. "NATO i përmbahet taktikës nga Lufta e Ftohtë për kufizimin e Rusisë. Një përkeqësim i mëtejshëm i situatës mund të ketë pasoja të paparashikueshme dhe serioze për sigurinë europiane", tha zëvendësministri i Jashtëm rus Grushko pas bisedimeve në ambasadën ruse në Bruksel.