Në Elbasan u nënshkrua memorandum i mirëkuptimit për rikualifikimin e lagjes Kala, në përpjekje për të ruajtuar trashëgiminë kulturore por edhe nxitur zhvillimin ekonomik të qytetit. Kryeministri Edi Rama u ndal tek historia dhe potenciali i kalasë së Elbasanit, teksa pati një koment edhe për kritikat e kundërshtarëve të tij politikë për projekte të tilla. “Kalaja e Elbasanit ka një histori dhe ka disa përbërës që kanë një potencial të jashtëzakonshëm. Këtu në Elbasan ka një besim të palëkundur tek hudhra si një komponent i rëndësishëm të mbajtjes larg të syrit të keq, por nëqoftëse do të na nderonte me vizitën e saj këtu kukuvajka kanarinë, ne do të ishim shumë mirënjohës sepse do të na jepte mundësinë që ta forconim këtë marrëdhënie mafioze, korruptive, kriminale me Fondin Shqiptar të Zhvillimit dhe të vinim të gjitha paratë e krimit të përbashkët në dispozicion të qytetit të Elbasanit, të bindur që nuk do kishte sy të keq që do të na afrohej më sepse do të kishim një hudhër 2.0 në dispozicion.” Ministri i Ekonomisë, Kulturës dhe Inovacionit, Blendi Gonxhja u ndal edhe tek Auto Motor Park Albania, pista e parë në vend për garat e shpejtësisë. “Do të ndërtojmë Auto Motor Park Albania në Elbasan. Për eventin vjetor që po bëhemi gati ta nënshkruajmë presim 300 mijë spektator dhe 1 miliardë shikuesish. Kurse në Elbasan ky event do të sjell më shumë punësim’” Memorandumi i Mirëkuptimit u firmos nga kryetari i Bashkisë së Elbasanit, përfaqësues të AADF-së, ministri i Ekonomisë, Kulturës dhe Inovacionit, si edhe ministri i Shtetit për Pushtetin Vendor.