Autoritetet kanë nisur të reagojnë pas denoncimeve publike në lidhje me një skemë mashtrimi piramidale që zhvillohej e gjitha online. Autoriteti Kombëtar për Sigurinë Kibernetik njoftoi identifikimin dhe mbylljen e tre platformave që shërbenin për të mashtruar qytetarët përmes premtimeve për fitime të mëdha dhe të shpejta, ndërsa policia e shtetit komunikoi se po heton përmes strukturave të saj të krimeve kibernetike dhe ekonomike përgjegjësit e këtyre skemave. Platformat e mbyllura nga autoriteti janë TXEX (Teks-eks) XUEXA (eksuu-eksa) dhe Grokrexduu (Grokreksdu). Deri më tani, hetimet kanë zbuluar se dy platformat e para kanë lidhje me njëra-tjetrën. Skema e mashtrimit është e njëjtë te të tre platformat dhe ajo është e ngjashme me skemat piramidale Ponzi, të përhapura masivisht në Shqipëri në mesin e viteve ’90, me dallimin e vetëm që tashmë ushtrohen online. Viktimave u premtohen investime në bursa, apo në kriptomonedha dhe fitime të mëdha nëse kalojnë në këto platforma paratë e tyre. Shuma minimale e kërkuar është 1 mijë euro dhe nëse përfshije në skemë persona të tjerë, premtohej përfitim më i madh. Për ta bërë më të besueshme skemën, organizatorët transferonin te viktimat shuma të vogla parash, duke ua prezantuar si fitime të investimit të tyre. Por, në momentin që një person kërkonte tërheqjen e të gjithë shumës që kishte në llogaritë e këtyre platformave organizatorët i kërkonin para shtesë, si tarifa për komisionet, apo për shërbimet e verifikimit. Ata që kanë paguar këto tarifa janë zhgënjyer dy herë, pasi veç humbjes së parave fillestare, kanë humbur edhe pagesat shtesë të kërkuara nga mashtruesit. Sipas denoncimeve që kanë marrë autoritetet deri më tani, skema ka qenë më e përhapur në Divjakë, Fier, Lushnje dhe në periferi dhe fshatrat e Lezhës.