Spiunët britanikë do të përdorin Dark-Webin për të rekrutuar informatorë dhe për t'u lejuar atyre të marrin informacione sekrete nga agjentë në Rusi dhe në mbarë botën, tha të enjten ministria e jashtme e Britanisë. Shërbimi i Inteligjencës Sekrete, agjencia britanike e spiunazhit të jashtëm e njohur si MI6, do të përdorë një portal të rrjetit të errët të quajtur Silent Courier, i cili do t'u lejojë njerëzve të kalojnë në mënyrë të sigurt detaje rreth aktiviteteve të paligjshme kudo në botë, ose të ofrojnë shërbimet e tyre. "Sot po u kërkojmë atyre që kanë informacione të ndjeshme mbi paqëndrueshmërinë globale, terrorizmin ndërkombëtar ose aktivitetin e inteligjencës shtetërore armiqësore të kontaktojnë MI6 në mënyrë të sigurt në internet," tha shefi i MI6, Richard Moore ndërsa shpalli zyrtarisht planet në një fjalim në Stamboll të premten. "Dera jonë virtuale është e hapur për ju," tha Moore, i cili më parë u ka bërë thirrje rusëve të spiunojnë për Britaninë. MI6, që u krijua në vitin 1909, por nuk u pranua zyrtarisht deri në vitet 1990, zakonisht vepron në hije, dhe vetëm kreu i saj, i njohur si "C", është një anëtar i shërbimit i emëruar publikisht. Në një video promovuese që shoqëronte njoftimin, thuhej se baza e operacioneve të MI6-ës kanë qenë takimet ballë për ballë, por tani ka ardhur koha e anonimatit të dark-ëebit, pjesës së errët të internetit me faqe të fshehura që përdoren shpesh nga persona si trafikantë droge, terroristë dhe abuzues seksualë të të miturve. Udhëzimet se si të përdoret portali, do të vendosen në kanalin e MI6 në YouTube, tha ministria e jashtme. "Ndërsa bota ndryshon dhe kërcënimet me të cilat përballemi shumëfishohen, ne duhet të sigurohemi që Mbretëria e Bashkuar të jetë gjithmonë një hap përpara kundërshtarëve tanë," tha ministrja e jashtme Yvette Copper. "Tani po forcojmë përpjekjet me teknologji të përparuar në mënyrë që MI6 të mund të rekrutojë spiunë të rinj për Mbretërinë e Bashkuar, në Rusi dhe mbarë botën."