Zëdhënësja e Komisionit Europian Ana Pisonero i është bashkuar zërave të partnerëve ndërkombëtarë të Shqipërisë që apelojnë për miratimin dhe zbatimin e marrëveshjes së 5 qershorit për kodin zgjedhor. Përmes një mesazhi në Tëitter, Pisonero sqaron qëndrimin e qartë të institucionit që ajo përfaqëson lidhur me këtë cështje. “Është thelbësore që marrëveshja e 5 qershorit për reformën zgjedhore në Shqipëri të ruhet, duke pasur parasysh domosdoshmërinë për të përmbushur rekomandimet e OSBE/ODHIR, një kusht i vendosur nga Këshilli marsin e kaluar para IGC. Çdo ndryshim shtesë legjislativ nuk duhet të rrezikojë këtë qëllim parësor”, ka shkruar zëdhënësja. Disa ditë më parë, për ndryshimet kushtetuese reagoi dhe zëvendëskryetari i i Grupit Parlamentar CDU/CSU-së, Johann Wadephul në Bundestag-un gjerman, I cili deklaroi se marrëveshja mes mazhorancës dhe opozitës e arritur në 5 qershor në Këshillin Politik, duhet të miratohet pa asnjë ndryshim. “Shpreh keqardhjen që marrëveshja e 5 qershorit nuk është kodifikuar akoma. Aprovimi me konsensusin e partive politike i Reformës Zgjedhore, pa asnjë ndryshim, si dhe zbatimi i saj është kyç për rrugën e Shqipërisë drejt BE-së. Nxis të gjitha palët, e në veçanti deputetët, ta finalizojnë këtë kriter të rëndësishëm. Forca Shqipëri!”, ishte mesazhi I Wadephul.