Amnesty International thotë në raportin për vitin 2024 se liria e medias në Shqipëri dhe pavarësia e gazetarëve është e kërcënuar vazhdimisht si nga aktorët politikë, ashtu edhe nga krimi i organizuar. Duke cituar gjetjet e mëhershme të Reporterëve pa Kufij, Amnisty International thotë se mungesa e rregulloreve që të mbrojnë gazetarët, ligjet e njëanshme në këtë sektor dhe konfliktet e interesit janë kërcënim për lirinë e medias. Organizata thotë se gazetarët u përballën me intimidime përgjatë vitit 2024 dhe këto intimidime mbërritën si nga politika, ashtu edhe nga krimi i organizuar. Gjithashtu dhuna seksuale e dhuna për shkak të gjinisë është një nga problematikat që ky raporti vë në qendër të analizës së problematikave të shoqërisë shqiptare. Në gjashtëmujorin e parë të vitit 2024 statistikat flasin për 686 gra të dhunuara në Shqipëri e 30 raste më shumë se një vit më pare. Edhe për këtë vit, Amnesty International kritikon mungesën e një institucioni të specializuar për trajtimin e të burgosurve me probleme mendore.