Muzika e lartë, çmimet e kripura dhe privatizimi masiv i bregdetit, do të kthehen shpejt në një histori të së kaluarës. Kështu paralajmëroi kryeministri Edi Rama, i cili gjatë prezantimit të planit të ri për bregdetin, veçoi Ksamilin, të cilin e konsideroi një plazh të dhunuar, që duhet t’i hiqet nga dora privatit. Rama: “Kjo është fjala e duhur për plazhin e Ksamilit, plazh i dhunuar. Nuk mund të jetë më pre’ e injorantëve që e shikojnë si një tokë për t’ u pushtuar dhe pastaj për t’u sjellë me turistët dhe me vizitorët si të ishin skllevër që mund të hanë edhe shkopin e çadrës në kokë, apo për të vendosur çmime për të qëndruar në një dendësi të paimagjinueshme në plazh, që janë çmime që vetëm lëndojnë imazhin e turizmit shqiptar dhe nga ana tjetër, në tërësi ne duhet të shërojmë plazhet e dhunuara, t’ua heqim nga dora privatëve. Nuk ka arsye më, që plazhi i Ksamilit të jetë një plazh privat ku dendësia është e lidhur me stresin, e lidhur me çmime marramendëse, e lidhur me një shërbim mizerabël.” Shefi i ekzekutivit, Edi Rama u shpreh se në kuadër të planit të ri, do të ndalohet muzika në ‘beach bar-e’ dhe do të ketë një concept ridimensionimi.