Njerëzit e qytetit të Khersonit në vijën e parë të frontit, në Ukrainë, kanë shumë arsye për të kërkuar një fund të luftës trevjeçare me Rusinë. Por shija e hidhur e pushtimit dhe sulmet e pamëshirshme që kur forcat ruse u zmbrapsën, i kanë bërë ata të kujdesshëm ndaj bisedimeve të paqes. Serhiy, 64 vjeç, është i shtruar në spital me këmbën e fashuar. Ai ishte duke ecur për të shkuar në punë kur u godit nga një granatë e lëshuar nga një dron rus nga përtej lumit Dnipro. "Nuk do të ketë paqe nëse ata janë në atë breg të lumit," tha ai. "Do të jetë tmerr i vazhdueshëm, granatime të vazhdueshme. Ne duhet t'i largojmë ata që andej, nuk ka rrugë tjetër". Qyteti dikur ishte shtëpia e gati 300,000 njerëzve, por popullsia është zvogëluar tani në 60,000. Nga marsi deri në nëntor 2022, forcat pushtuese ruse arrestuan dhe torturuan shumë njerëz atje. Rusët, që hedhin poshtë akuzat për abuzim të civilëve, u detyruan të largoheshin nga një kundërofensivë ukrainase. Tani ata bombardojnë pa pushim nga bregu tjetër i lumit.