Emigrantët që kalojnë kanalin anglez do të dërgohen në Shqipëri në një qendër të re azili me një kosto prej 100 mijë paundësh për person ndërsa franca nuk bie dakord të ndalen të gjitha kalimet. Kështu shkruan e përditshmja britanike Daily Mail, sipas të cilës, ministrat po diskutojnë për hapjen e një qendre azili në Shqipëri që shpresojnë se do të veprojë si një devijim për emigrantët. Gjasat e arritjes së një marrëveshjeje me Tiranën tani duken të mira – thotë një burim nga qeveria britanike. E gjithë kjo vjen pasi sekretarja e brendshme, Priti Patel, më herët këtë javë premtoi se do të punonte për të ndaluar në masën 100 për qind kalimin e klandestinëve në kanal. Kushdo që kërkon azil në Britani, pas arritjes përmes trajektoreve ilegale, si gomone apo barka të vogla, do të dërgohet në këtë qëndër të re brenda vetëm shtatë ditësh – shkruan Times. Sidoqoftë, mediat britanike përllogarisin se plani do të rëndojë në xhepat e taksapaguesve vendas për fluturimin dhe akomodimin. “Dërgimi i emigrantëve në një qendër azili jashtë vendit është shpresa jonë më e mirë pasi asgjë tjetër nuk po funksionon”, tha një ministër i qeverisë britanike. Raporte të mëparshme për planet e qendrave të azilit jashtë britanisë, përfshinin edhe përdorimin e platformave të naftës jashtë përdorimit në detin e zi. Por mundësia e nënshkrimit të një marrëveshjeje me tiranën tani duket e mirë – thotë burimi nga qeveria britanike, pavarësisht se ministrja e jashtme, olta Xhacka e hodhi poshtë idenë muajin e kaluar. Një muaj më parë edhe zëdhënësi i kryeministrit Edi Rama, e hodhi poshtë lajmin që u shfaq në mediat britanike, duke e konsideruar atë absolutisht të pavërtetë.