Ukraina do t'i intensifikojë sulmet ndaj rafinerive ruse të naftës në përgjigje të një politike të re të sulmeve ajrore nga Moska, e krijuar për t'i detyruar njerëzit të largohen nga Kievi dhe qytete të tjera, por nuk do të shënjestrojë civilët, tha Presidenti Volodymyr Zelensky. Shërbimet e inteligjencës së Ukrainës kanë siguruar dokumente që tregojnë se lideri rus Vladimir Putin kishte nxjerrë një "doktrinë të re" të sulmeve ushtarake ndaj një game shumë më të gjerë objektivash civile para këtij dimri, tha Zelensky. "Ne pamë dokumente dhe e dimë se ato u lejojnë atyre të sulmojnë infrastrukturën, logjistikën dhe veçanërisht të sulmojnë në qytete, në fshatra, në rrugë, shkolla, spitale," i tha Zelensky agjencisë Reuters në një intervistë. "Të ushtrojnë presion mbi njerëzit që të largohen nga kryeqyteti, të largohen nga qytete të ndryshme: ky është qëllimi i operacionit."