Me ngjyrën e tij ikonike të ndryshkut, Marsi është quajtur prej kohësh planeti i kuq. Tani, shkencëtarët mund të kenë zbuluar burimin e mundshëm të këtij ngjyrimi të veçantë, duke përmbysur një teori popullore që qarkullonte deri më tani. Marsi është një nga planetët më të studiuar në sistemin tonë diellor për shkak të afërsisë së tij me Tokën dhe anijeve të shumta kozmike që kanë vizituar gjatë dekadave të fundit. Së bashku, orbituesit dhe zbarkuesit, u kanë ofruar shkencëtarëve të dhëna që tregojnë se ngjyra e kuqe e Marsit vjen nga mineralet e hekurit të ndryshkur brenda pluhurit që mbulon planetin. Në një moment, hekuri brenda shkëmbinjve në Mars ka reaguar në kontakt me ujë ose me oksigjen në ajër, duke krijuar oksid hekuri, njësoj me formimin e ndryshkut në tokë. Gjatë miliarda viteve, oksidi i hekurit u shpërbë në pluhur dhe u përhap në të gjithë planetin, pasi u zhvendos nga erërat marsiane. Analizat e mëparshme të oksidit të hekurit në Mars, bazuar vetëm në vëzhgimet nga anijet kozmike, nuk zbuluan asnjë provë të ekzistencës së ujit, gjë që i bëri studiuesit të besonin se oksidi i hekurit duhet të jetë hematit. Ky mendohej të ishte formuar përmes reaksioneve me atmosferën marsiane në një proces që ndodhi gjatë miliarda viteve. Nëse do të ishte kështu, hematiti do të ishte formuar më vonë në historinë e Marsit, pasi dyshohej se dikur kishte liqene dhe lumenj në sipërfaqen e tij. Hulumtimi i ri që kombinon të dhënat nga misionet e shumta në mars, sugjeron se një mineral që formohet në prani të ujit të ftohtë mund të jetë përgjegjës për ngjyrën e kuqe të planetit. Dhe kjo mund të ndihmojë shkencëtarët të kuptojnë se si ka qenë marsi miliona vite më parë dhe nëse ai ka qenë potencialisht i banueshëm.