Në disa qytete australiane është protestuar kundër masave të ashpra, të marra në kuadër të luftës ndaj koronavirusit. Mijëra persona janë mbledhur në Sidnej, ndërsa organizime më të vogla janë raportuar në Melburn dhe Brisbein. Njerëzit bërtisnin “liri”, teksa kanë marshuar në qendër të Sidnejt. Zyrtarët bënë të ditur se kanë kryer 57 arrestime. Qeveria në Australi ka rikthyer masat e izolimit, pas rritjes së numrit të të infektuarve me koronavirus. Përhapja e variantit Delta të koronavirusit ka sfiduar strategjinë paraprake të këtij vendi, që përfshinte mbyllje të kufijve, programe të karantinës dhe izolime të shpejta, që ka ndihmuar në uljen e numrit të të infektuarve. Shkalla e vaksinimit mbetet e ulët në këtë vend, pasi më pak se 14 për qind e popullsisë është imunizuar. Sipas të dhënave të publikuara nga Universiteti Johns Hopikins, Australia ka regjistruar 32,594 raste dhe 916 viktima, që prej shpërthimit të pandemisë.