Ka patur disa caste tensioni për Charlenën e Monakos. Princesha 43 vjecare, bashkëshortja e princit Albert, është shtruar në spital në Afrikën e Jugut pasi kishte pësuar një kolaps. Lajmi është konfirmuar edhe nga bashkëshorti i saj me një postim në rrjetet sociale: “Tani gjendja e saj është stabël, ka dalë nga spitali dhe të gjithë po lutemi për të”. Princesha Charlene u transportua me urgjencë në spital mbrëmjen e të mërkurës por tani është në shtëpinë e saj, në gjendje stabël – thuhet edhe në faqen zyrtare të instagramit të Principatës së Monakos. Sipas shtypit gjerman, Charlene ishte shtruar në një spital në brigjet lindore të afrikës së jugut, në qytetin Durban, nën një pseudonim. Sëmundja misterioze e Charlene, vjen pikërisht atëherë kur princi Albert kishte njoftuar kthimin në shtëpi të së shoqes. Është gati të kthehet – kishte paralajmëruar ai, por nevojitet miratimi i mjekëve. Prej shtatë muajsh Charlene është në afrikën e jugut, vendlindjen e saj, për tu kuruar nga një infeksion i rëndë që e ka detyruar ti nënshtrohet disa ndërhyrjeve kirurgjikale. Pak ditë më parë ajo mundi të përqafonte edhe dy fëmijët e saj binjakë, që nuk i kishte parë që prej largimit nga Monako. Ky incident i fundit, sidoqoftë, rindez zërat për një krizë mes ciftit. Prej muajsh mediat franceze flasin për një divorc të pritshëm.