Presidenca gjermane e BE në këtë gjashtëmujor nuk ishte ashtu sic e kishin menduar gjermanët. Këtë e theksoi edhe kancelarja Merkel, para fillimit të samitit të së enjtes. "Shumë gjëra nuk u zbatuan, dhe kjo është për të ardhur keq", tha Merkel në Bundestag një ditë më parë. Samiti i fundit i BE do duhej të ishte kurorëzimi madhështor i presidencës së dytë të BE të drejtuar nga Merkeli që ndodhet para fundit të karrierës së saj politike. Por pandemia e koronavirusit, britanikët, kriza që shkaktuan Hungaria dhe Polonia e ndryshuan situatën. Këto dy vende të fundit, luajtën poker deri në minutën e fundit. Për të penguar verifikimin e ligjshmërisë para dhënies së mjeteve fianciare nga buxheti i BE, ato vunë veton për të gjithë buxhetin 7 vjeçar të BE që ka një vëllim afër 1,1 miliardë euro. Një tjetër konflikt është ai me turqinë, që duket se nuk po gjen zgjidhje. Merkel u shpreh e zhgënjyer, që Erdogan në këto tre muaj të fundit nuk ka qenë i gatshëm të fliste me Greqinë dhe Qipron për konfliktin e rezervave të gazit në Mesdhe. Presidenca gjermane propozon tashmë, që të vendosen sanksione kundër disa qytetarëve turq dhe sipërmarrjeve, që marrin pjesë në shfrytëzimin e gazit në Mesdhe. Në tryezën e pjesëmarrësve në samitin e BE të enjten dhe të premten qëndron propozimi për objektivat e klimës të vitit 2030 ku vështirë të arrihet pajtim mes vendeve. Brexiti në anën tjetër, vazhdon të mbetet një problematikë, me përpjekjet e minutës së fundit për të arritur një marrëveshje që me gjasë do të dështojnë.