Presidenti amerikan, Donald Trump, i ka dhënë Volodymyr Zelenskyt një ultimatum sipas të cilit ai ka kohë deri në Krishtlindje për të pranuar marrëveshjen e paqes me Rusinë. Të dërguarit e Presidentit të SHBA-së, Jared Kushner dhe Steve Ëitkoff, ia dhanë paralajmërimin e ashpër udhëheqësit ukrainas pas bisedimeve të vështira me Vladimir Putinin në Moskë. Trump pretendoi se Ukraina nuk do të jetë në gjendje t'i rezistojë bombardimeve të mëtejshme nëse nuk nënshkruhet një marrëveshje. Ai gjithashtu sulmoi udhëheqësit evropianë, duke i etiketuar ata si “të dobët” për dështimin në përfundimin e konfliktit. Shefi i Shtëpisë së Bardhë i akuzoi gjithashtu evropianët se po krijojnë një kontinent “që po kalbet”, të shkatërruar nga një axhendë politike e krahut të majtë radikal dhe nivele të larta të migracionit të paligjshëm. Zyrtarët ukrainas ndjejnë se Uashingtoni po shton presionin mbi Kievin për të hequr dorë nga territori në këmbim të garancive të papërcaktuara të sigurisë. Duke folur në mediat sociale të martën në mbrëmje, Zelenski tha se Ukraina po punonte në mënyrë "shumë aktive" me aleatët e saj evropianë për të formuluar një propozim për t'i dhënë fund luftës. Në një intervistë për Politicon, Trump tha: “Rusia ka epërsinë, dhe gjithmonë e ka pasur. Ata janë shumë më të mëdhenj. Janë shumë më të fortë. Unë i jap popullit të Ukrainës dhe ushtrisë së Ukrainës merita të jashtëzakonshme për trimërinë dhe luftimet. Por e dini, në një moment, i madhi fiton, në përgjithësi. Dhe kjo është një madhësi masive kur sheh numrat”, tha ai.