Vijon operacioni policor i koduar "wanted 2", për kapjen dhe ndjekjen penale të shtetasve të shpallur në kërkim. Në kuadër të këtij operacioni, është arrestuar një 32-vjeçar me iniciale K. Q., i shpallur në kërkim nga policia e Korçës. Ai akuzohet për kryerjen e veprës penale të ofrimit të ndihmës emigrantëve për kalimin e paligjshëm të kufijve. I riu, banues në fshatin Luzat, është kapur dhe arrestuar në Tepelenë. Ai ishte shpallur në kërkim pasi, Gjykata e Shkallës së Parë të Juridiksionit të Përgjithshëm Korçë i kishte caktuar masën e sigurisë "Arrest në burg" për veprën penale "Ndihma për kalimin e paligjshëm të kufijve", kryer në bashkëpunim. Ai u arrestua nga Specialistët e Seksionit për Hetimin e Trafiqeve dhe Narkotikëve, në bashkëpunim me Seksionin Operacional të policisë Gjirokastër, bazuar në informacionet e siguruara nga inteligjenca policore.