Një vjedhje spektakolare ka tronditur botën e artit në Francë. Persona ende të paidentifikuar kanë grabitur nga Qendra e Artit Bashkëkohor në Issoire, në rajonin Auvergne, veprën monumentale “L’Apocalypse”. Vepra peshon rreth 210 kilogramë dhe është e dekoruar me ar dhe gurë të çmuar. Vetëm kopertina prej bronzi, e realizuar nga artisti i njohur spanjoll Salvador Dalí, peshon rreth 150 kilogramë. “L’Apocalypse” u konceptua në vitin 1959 nga botuesi i librave të artit Joseph Foret, i frymëzuar nga “Apokalipsi” i Shën Joanit. Në krijimin e saj morën pjesë shtatë artistë, mes tyre Dalí, Georges Mathieu, Bernard Buffet dhe Leonor Fini. Projekti përfshiu edhe shtatë shkrimtarë dhe mendimtarë të njohur, përfshirë Jean Cocteau, Emil Cioran dhe Ernst Jünger. Vepra është ekspozuar në vende të ndryshme të botës që prej vitit 1961. Në vitin 2002 ajo u ble nga koleksionisti Christian Karoutzos, i cili ka treguar se iu deshën rreth dhjetë vjet për të shlyer blerjen.