Pfizer ka njoftuar se pilula e saj antivirale, eksperimentale, kundër Covid-19-ës, është në gjendje të reduktojë shkallën e shtrimit në spital dhe humbjes së jetës në masën 90 për qind. Shtëpia farmaceutike ka bërë të ditur se do të kërkojë sa më shpejt që të jetë e mundur autorizimin për komercializimin e pilulës nga ana e administratës amerikane të ushqimit dhe ilaceve dhe entet e tjera rregullatore ndërkombëtare. Pfizer ka ndërprerë më herët testet klinike të ilacit antiviral pasi rezultatet paraprake treguan një reduktim në masën mbi 89 për qind të rrezikut për shtrim në spital apo vdekje tek pacientët në rrezik. Sipas kompanisë, rezultati i testeve të pilulës së Pfizer është akoma më i mirë se ai i Molnupiravirit të kompanisë Merck, që ka një efikasitet në reduktimin e rreziqeve prej 50 për qindësh.