Kosova ia ka ndaluar hyrjen drejtorit të Zyrës për Kosovën në Qeverinë e Serbisë, Peter Petkoviç, për shkak se në vizitat e tij të fundit në Kosovë, ai ka bërë “deklarata provokuese”. Petkoviq ka thënë se Kosova nuk e lejoi që të qëndrojë në një vizitë dyditore në Kosovë, të planifikuar më 3 dhe 4 shtator. “Në kundërshtim me obligimin e marrë dhe zotimin që do të përmbahet nga deklaratat provokuese dhe nxitëse të urrejtjes, ai në vazhdimësi në tri vizitat e fundit haptazi ka përdorur gjuhë të urrejtjes dhe nxitëse, duke kulmuar në vizitën e fundit në inaugurimin e të ashtuquajturit ‘universitetet’ në Mitrovicë të Veriut”, thuhet në një deklaratë të Ministrisë së Punëve të Jashtme dhe Diasporës së Kosovës. Megjithatë, Ministria nuk ka sqaruar se cilat deklarata të Petkoviçit i cilëson si provokuese dhe nxitëse të urrejtjes. Nga Zyra për Kosovën në Qeverinë e Serbisë, më herët thanë se Petkoviç ishte planifikuar që të qëndronte dy ditë në Kosovë, për të vizituar disa subjekte biznesi “ku shteti i Serbisë ka siguruar vende të reja pune” si dhe për të vizituar disa familje që jetojnë në kushte të rënda ekonomike. Sipas kësaj zyre, kjo është ndalesa e tretë me radhë që Kosova i vendos Petkoviçit dhe kjo “në prag të vazhdimit të dialogut në Bruksel javën e ardhshme”. Nga kjo zyrë paralajmëruan se këto ndalesa do të jenë pjesë e diskutimeve në Bruksel. Kosova dhe Serbia, në kuadër të dialogut të ndërmjetësuar nga Bashkimi Evropian, më 2011 kishin arritur edhe marrëveshje për vizitat zyrtare, ku thuhet se palët duhet ta njoftojnë njëra-tjetrën për vizitat në shtetet përkatëse.