Filipinet të enjten dënuan me tone të ashpra veprimet e tre anijeve të rojës bregdetare kineze që sipas saj, bllokuan dhe përdorën ujin me presion mbi barkat që po lundronin drejt një ishulli filipinas në detin e kinës së jugut. Zyrtarët filipinas thanë se askush nuk ishte lënduar në incident por anija që po transportonte ushqime për personelin ushtarak të vendosur atje, u detyrua të braktiste misionin. “Kina nuk ka të drejta të veprojë në këtë zonë. Anijet kineze duhet të kthejnë timonin dhe të zbrapsen”, thanë ata në një deklaratë. Autoritetet filipinase kanë dënuar ngjarjen edhe në praninë e ambasadorit të Kinës në Manila. Vetë ambasada kineze nuk ka dhënë ende komente. Ishulli në të cilin është regjistruar incidenti, ndodhet 195 km larg Palavanit, brenda zonës ekskluzive ekonomike të Filipineve dhe një kontigjent ushtarak është i vendosur atje që nga 1999. Kina e konsideron ishullin në anën tjetër territor të saj sic bën edhe me shumë të tjerë në detin e Kinës së jugut. Një vendim arbitrazhi ndërkombëtar, në 2016-ën, sidoqoftë, përcaktoi se kina nuk kishte të drejtë në pretendimin e saj.