Facebook dhe rrjete tjera sociale janë bllokuar në Mianmar, disa ditë pasi ushtria përmbysi qeverinë dhe arrestoi lideren de fakto, Aung San Suu Kyi duke marrë pushtetin në duart e saj. Mes platformave të bllokuara është dhe ËhatsAppi e Instagrami. “Ne u bëjmë thirrje autoriteteve që të rikthejnë komunikimin, në mënyrë që njerëzit në Mianmar të mund të flasin me familjen dhe miqtë dhe të kenë qasje në informacione të rëndësishme”, u shpreh zëdhënësi i Facebook-ut, Andy Stone. Qytetarët atje e kanë përdorur shumë Facebookun që kur ushtria mori kontrollin në 1 shkurt, dhe shumë kishin përdorur pikërisht rrjetin social për të shprehur pakënaqësinë e tyre. Ministria për Komunikime dhe Informacion, u shpreh se Facebook do të mbetet i bllokuar deri në 7 shkurt.“Persona që janë të shqetësuar për stabilitetin e shtetit...po perhapin lajme të rreme dhe dezinformata, duke shkaktuar keqinformim tek përdoruesit e Facebookut”, citohet të ketë thënë kjo ministri. Ndalimi i Suu Kyi, fituese e Nobelit të Paqes në 1991, ka nxitur thirrje për lirim nga Shtetet e Bashkuara dhe shtetet perëndimore.Ushtria sakaq e akuzon qeverinë e saj se nuk ka hetuar supozimet për mashtrime me vota në zgjedhjet e 8 nëntorit, në të cilat partia e Suu Kyis fitoi 80 për qind të votave, sipas Komisonit Zgjedhor vendas.