Prokuroria e Tiranës ka mbyllur hetimet për rrëmbimin dhe më pas ekzekutimin e biznesmenit Rruzhdi Hoxha dhe ka çuar për gjykim autorin e dyshuar Fredi Rrushi me akuzën e vrasjes. Rrushi veç akuzës së vrasjes mban mbi supe edhe atë të armëmbajtjes pa leje, zhdukjes së provave dhe të kufomës. Policia pas provave të grumbulluara arriti të gjejë trupin e pajetë të biznesmenit të groposur në malin e Dajtit, teksa ende nuk është arritur të gjendet automjeti me të cilin u rrëmbya biznesmeni Hoxha, apo pistoleta e krimit. Ka qenë familja që denoncoi sit ë zhdukur biznesmenin më 24 tetor 2021, teksa 13 ditë më vonë, përkatësisht më 6 nëntor 2021, ai do të gjendej i pajetë në një zonë të thellë në Malin e Dajtit. Policia zbuloi një plagë pas koke e cila ishte shkaktuar nga një armë zjarri. Sipas po të njëjtave burime thuhet se pasi u qëllua, Hoxha u hodh në greminë, ku u gjet i mbuluar me zhavorr dhe gjysmë i dekompozuar.