Gara për të prodhuar vaksinën e parë në botë kundër Covidit, nuk është vetëm cështje e shëndetit publik. Duket se ajo ka të bëjë edhe me një rivalitet gjeopolitik, të ngjashëm me atë të uljeve në hënë. Menjëherë pas njoftimit të së hënës se vaksina e Pfizer BionTech ishte 90 për qind efektive në testime, rusia tha se kandidatja e saj Sputnik V, ishte akoma më efektive duke reduktuar mundësinë e infektimit me 92 për qind. Fondi sovran i pasurisë në Rusi, që ka mbështetur vaksinën, tha se rezultatet e saj ishin mbështetur në të dhëna nga 16 mijë pjesëmarrës në testim, që kishin marrë të dyja dozat e vaksinës. “Bazuar në këto rezultate, ne kemi një vaksinë shumë efikase”, tha Kirill Dimitriev, kreu i këtij fondi duke shtuar se ky është ai lloj lajmi për të cilin prodhuesit e vaksinës do të flisnin një ditë me stërnipërit e tyre. Shanset për tu prekur nga koronavirusi ishin 82 për qind më të ulëta tek njerëzit e vaksinuar me sputnik V se ata që kishin marrë placebo, thanë ekspertët rusë. Faza e tretë e testimeve vazhdon në 29 klinika në moskë dhe përfshin 40 mijë vullnetarë në total. Pavarësisht pretendimeve, Sputnik V nuk është një nga vaksinat që konsiderohet gjerësisht si ndër premtueset.