Presidenti i përkohshëm i Sirisë, Ahmed al-Sharaa ka konfirmuar se aktualisht po zhvillohen negociata mes Damaskut dhe Tel Avivit, me synim arritjen e një marrëveshjeje sigurie. Al-Sharaa deklaroi për televizionin shtetëror sirian se qëllimi i këtyre bisedimeve është që Izraeli të rikthehet në pozicionet e tij të mëparshme, para datës 8 dhjetor, kur regjimi i Bashar al-Assad u rrëzua nga pushteti. “Negociatat nuk kanë përfunduar ende”, theksoi ai. Izraeli dhe Siria, të cilat zyrtarisht ndodhen në gjendje lufte që nga viti 1948, kishin arritur më 1974 një pakt armëpushimi pas luftës së vitit 1973. “Izraeli konsideron se me rënien e regjimit, Siria është tërhequr nga marrëveshja e vitit 1974, edhe pse Siria që nga momenti i parë ka treguar përkushtim ndaj këtij pakti”, u shpreh al-Sharaa. Ndërkohë, gjatë muajve të fundit Izraeli ka intensifikuar sulmet në jug të Sirisë dhe në kryeqytetin Damask, duke deklaruar se vepron për mbrojtjen e minoritetit druze. Muajin e kaluar, palët zhvilluan bisedime të drejtpërdrejta nën ndërmjetësimin e Shteteve të Bashkuara.