“Polonia dhe NATO nuk janë të përgatitura për këtë lloj sulmi. Momenti është vendimtar: nevojitet një përgjigje e fortë, sepse Putini sheh dobësi në kampin tone”. Kështu këshillon John Bolton, 76 vjeç, republikan, ishte ambasadori i SHBA-së në OKB nga viti 2005 deri në vitin 2006 dhe këshilltari i sigurisë kombëtare i Donald Trump nga viti 2018 deri në vitin 2019. Ai foli për Corriere Della Sera, ku thotë se dronët mbi Poloni nuk janë incident. Sipas Bolton, rusët nuk janë të sinqertë kur thonë se dronët ishin nisur drejt Ukrainës, por dolën jashtë kontrollit dhe përfunduan në territorin polak. Ish këshilltari i Trump për sigurinë thotë se alibia e Moskës nuk është bindëse dhe dyshon se sulmi mbi Poloni ishte një testim për gatishmërinë dhe vendosmërinë e NATO-s. “Së pari, Putini donte të shihte se si do të reagonim ne. Së dyti, mendoj se Putini lëshoi ​​një sfidë politike për të parë se cili do të ishte reagimi kolektiv i NATO-s”, thotë Bolton. Sipas tij, Perëndimi nuk është mjaftueshëm i përgatitur për të përballur teknikat e reja luftarake, sidomos me sistemet antidronë.