Një rrjet i drejtuar nga sirianët që pastronte paratë e trafikantëve të drogës në Itali dhe Francë u shkatërua nga autoritetet italiane. Grupi kriminal i pastronte paratë duke i shndërruar në shufra ari, e më pas i transferonte ato në shtete të ndryshme përfshirë Kosovën. Pesë persona përunduan në pranga. Ata u ndaluan në raonet veriore të Piedmontit dhe Lombardisë, ndërsa u sekuestruan 17 mln euro. Hetimi u krye nga një ekip i përbashkët që përfshinte policinë tatimore të Italisë dhe xhandarmërinë franceze në Marsejë dhe përpjekjet u koordinuan nga drejtoria kombëtare kundër mafias në Itali dhe zyra e prokurorit në Marsejë, së bashku me Eurojust dhe Europol. Gjatë një periudhe më shumë se gjashtë muaj, të dyshuarit mblodhën më shumë se 17 milionë euro nga fitimet e drogës, kryesisht në Francë, dhe transportuan paratë në automjete drejt një zone pranë Piedmontit në Itali, që gjendet në kufi me Francën, thanë prokurorët. Aty, sipas hetuesve, në bashkëpunim me tre biznese për shkrirjen e metaleve të çmuara në Piedmont dhe Lombardi, paratë u shndërruan në shufra dhe fleta ari në vlerën e njëjtë monetare. Ari më pas u transportua në Kosovë, Maqedoni të Veriut, Turqi dhe Marok. “Është hera e parë që hetuesit kanë arritur të rindërtojnë rrjedhjen e parave të drogës, të gjeneruara jashtë vendit, të cilat më pas janë shndërruar në ar – një aset që më lehtë transportohet”, njoftoi prokuroria ndërsa bëri me dije se ka identifikuar një rrjet të gjatë kriminal ku janë përfshirë sirianë por dhe nga shtete të tjera.